आज दिनांक 03.03.2023 के समाचार - आपन देवरिया

 1. गरमी के मवसम सुरु हो गइल बा। आग से खेलवाड़ बिलकुल मत करीं। गरमी में जगहि-जगहि गांवन में आगि लागेला। त सावधान रहले के ताक बा। आग लगले पर दमकल विभाग के भी फोन जरूर करीं अउर पलानी-ओलानी की आस-पास में आगि-ओगी फेंकले से बचीं।  आज गौरीबाजार की बंसहिया गांव में आगि लगले से 3गो मवेसी झुलसि गइल बाने सन.....कपड़ा-लत्ता भी। जेकर घर जरल बा, ओकर कहनाम बा की केहू रंजिस बस जानि-बूझी के आग लगा देले रहल ह...देखीं दुस्मनी की चलते भी एइसन काम महापाप होला...महाभारत में देखीं...सांप करन से कहलसि की हमके तीरे पर चढ़ा के अरजुन की लगे भेजि द...हम उनके दंसि देइब...लेकिन करन एंगा ना कइलस...भीतरघात कबो ना करे के चाहीं...भले दुसम्ने काहें ना होखे....ना त भगवान कबो माफ ना करिहें। दुस्मन के नीचा देखावे के बा...मनई के गुन ह, त समय परले पर ओकर मदद क दीं....ओकर नजर अपनी आपे झुकी जाई....जय-जय।

2. सरकारी सामानन की चोरी से बचले के ताक बा। सरकार, अधिकारी लोग रउरिए बिकास खातिर काम करावता लोग, त मदद करीं न कि कहीं सड़कि आदि बने खातिर इंटा, गिट्टी, बालू धइल होखे, त ओ के उठा ले जाईं। काहें की आज एही तरे के एगो समाचार भटनी में पढ़े के मिलल ह।

3. आज पथरदेवा में एगो प्रेसवार्ता में पूर्व कैबिनेट मंतिरी श्री बरमासंकर तिवारी जी कहनीं हं कि भाजपा की राज में लोग महंगाई से परेसान बा....गैस के भाव 50 रुपिया बढ़ा देहल गइल बा....2024 में सपा के सरकार बनी त जनता के महंगाई से पीछा छोड़ावल जाई।

4. काल्हि बसपा के बैठक ओकरी कार्यालय पर भइल रहे। जवने में इ तय भइल की गांव-गांव बइठकि क के संगठन के मजबूत कइल जाई।

आज एतने....सुनीं न....जल्दिए कुछ बात-विचार, बतकही भी ले के आवल जाई....जय-जय

Comments

Post a Comment

Popular posts from this blog

आज दिनांक 02.03.2023 के समाचार - आपन देवरिया

 1. अपनी जिला देवरिया से एगो अजबे समाचार पढ़े के मिलल बा। भागलपुर विकास खंड की मुरासो गांव में सांप कटले से जवने 10 बरिसहा लइका के मुअल समझि के सरजू नदी में बहा देहल गइल रहे, उ 15 बरिस की बाद अपनी गांवे लउटल बा। जानतानी, इ लइका की लवटले से पूरा घर-गांव में खुसी के माहौल हो गइल बा। भइल इ रहे कि लइका के सांप कटले पर ओकरी मुंह से गाज मने झाग निकले लागल...फेर उ सांत हो गइल। ओकरी बाद एक जाने डाक्टर ओ के मिरित घोसित क देहने। फेन परिवार के लोग ओ लइका के केरा की डमुआ पर सरजू जी में बहा देहल...बहत-बहत उ लइका एगो सपेरा के मिलल। फेर सपेरा की झाड़-फूंक से उ ठीक हो गइल। अउर 15 बरिस की बाद अब गांवे लवटल बा.....जय-जय हो....।  इ तनी पुरान समाचार ह...पर जल्दिए कोसिस कइल जाई की रउआं सब की सामने ताजा समाचार परोसल जाव.........जय-जय 2. सुनीं न घटतौली मामला में प्रतापपुर चीनी मिल पर देवरिया के डीएम 1 लाख के जुरमाना लगवले बाने। इ किसान हित में बा....आभार जिलाधिकारी महोदय। 3. बड़ी दुख के बात बा की देवरिया जिला में भी मिठाइयन में दुकानदार लोग, मिलावट करता.....एइसन मत करीं...महराज...इमानदारी से कमाईं, ...
Read more

आज दिनांक 04.04.2023 के समाचार - आपन देवरिया

  जय-जय सियाराम। जय देवरिया। अब रउआं बाबा गोपालपुरिया से अपनी जिला देउरियां की साथे-साथे कुछ जरूरी समाचार सुनीं। 1.       उत्तर प्रदेश जोगीजी सरकार द्वारा साल 2023-24 खातिर गेहूं खरीद के समर्थन मूल्य घोसित क देहल गइल बा। 1 अपरइल से 15 जून ले गेहूं के सरकारी खरीद 2125 रुपिया प्रति कुंटल की हिसाब से कइल जाई। पिछला साल 2015 रुपिया की हिसाब से खरीदारी कइल गइल रहे। सब किसान लोगीं से चिरउरी बा की एकर लाभ उठावे कातिर आपन पंजीयन करा लीं....1 मार्च से पंजीयन के काम सुरु हो गइल बा। इ पइसा रउरी आधार से लिंक बैंक खाता में आई। जे धान खातिर पंजीयन करा ले ले बा, ओकरा फेन से पंजीयन करावे के जरूरत नइखे। धेयान दीं, राउर बैंक खाता सक्रिय होखे के चाहीं। जय देवरिया – जय किसान। 2.       अपनी देउरियां में बैंकन के कर्जा वसूली अउर मोटर दुर्घटना प्रतिकर मामलन खातिर प्री-लिटिगेसन स्तर पर लोक अदालत लगावल जाई। एके सफल बनवले में सहायता करीं। 3.       रसोई गैस की दाम में भइल बढ़ोत्तरी के ले के जनता में गुस्सा साफ नजर आवता। पार्ट...
Read more